БНХАУ-ЫН ЦАХИЛГААН АВТОМАШИН ҮЙЛДВЭРЛЭГЧИД ТАЙЛАНД БОЛОН ИНДОНЕЗИД БОРЛУУЛАЛТААРАА ӨРСӨЛДӨЖ, ЯПОНЫ АВТОМАШИН ҮЙЛДВЭРЛЭГЧИД ЗАХ ЗЭЭЛИЙН ХУВИА АЛДАХААС БОЛГООМЖИЛЖ БАЙНА.

Зүүн Өмнөд Азийн 1 болон 3 дахь автомашины хамгийн том зах зээл болох Индонез, Тайландын цахилгаан автомашины борлуулалтад Хятадын автомашин үйлдвэрлэгчдийн хооронд өрсөлдөөн ширүүсэж байна. Энэхүү өрсөлдөөн нь цахилгаан автомашины салбарыг дэмжих зорилгоор хоёр улсын Засгийн газраас хэрэгжүүлж буй хөнгөлөлт, урамшууллын улмаас нэмэгдэж байгаатай холбоотой ажээ. Гэхдээ эдгээр урамшуулал нь гол төлөв хосолсон хөдөлгүүрийн технологид давуу талтай Японы автомашин үйлдвэрлэгчдэд бараг ашиггүй байгаа нь тэдний зах зээлд эзлэх байр суурь буурах вий гэсэн болгоомжлолыг төрүүлж байгаа юм. Тайландад 2024 онд цахилгаан автомашины (EV) борлуулалт нийт 573,000 шинэ автомашин борлуулалтын 10 хувиас давжээ. BYD компани ихээхэн хөнгөлөлт үзүүлсний улмаас EV зах зээлийн 40 хувийг эзэлж, борлуулалтаа нэмэгдүүлжээ. 2025 оны 1 дүгээр сараас 6 дугаар сарын хооронд BYD нийт шинэ автомашины борлуулалтаараа 7.8 хувиар дөрөвдүгээрт орж, Mitsubishi Motors-ийг (4.5 хувь) давжээ. Японы автомашин үйлдвэрлэгчид 1960-аад онд Тайландын зах зээлд орж ирсэн бөгөөд 2010 онд зах зээлийн 92.3 хувийг эзэлж байв. Харин энэ тоо 2023 онд 80 хувиас доош бууж, 2025 оны 1-ээс 6 дугаар сарын хооронд 70.6 хувьд хүрчээ.

2022 оноос хойш Тайландын Засгийн газар тус улсад шинэ цахилгаан автомашины үйлдвэрийн төв байгуулсан компанид нэг цахилгаан автомашин тутамд 150,000 баат (6,000 ам.доллар) буюу ойролцоогоор 700,000 иений татаас олгохоос гадна, компанийн орлогын татварын хөнгөлөлт зэрэг бусад давуу нөхцөлийг үзүүлж байна.

Эх сурвалж: The Nation Thailand