images

ИРГЭДИЙН АНХААРАЛД

МЭДЭЭ

2025-04-02

13

Мьянмарын Холбооны Бүгд Найрамдах Улсын Мандалай, Сагайнг хот орчимд энэ оны 03 дугаар сарын 28-ны өдөр болсон 7.7 магнитудын хүчтэй газар хөдлөлт болон уг газар хөдлөлтийн чичирхийллийн улмаас мьянмар, тайланд зэрэг улсад олон хүний эрдэнэт амь нас эрсдэж, эд материалын ихээхэн хэмжээний гарз хохирол учирсан.

            Өнөөдрийн байдлаар дээрх газар хөдлөлтийн дараа 1.0-2.9 магнитудын хүчтэй 78, 3.0-3.9 магнитудын хүчтэй 116, 4.0-4.9 магнитудын хүчтэй 56, 5.0-5.9 магнитудын хүчтэй 9, 7.0 магнитудын хүчтэй 1, нийт 260 газар хөдлөлтийн дараахь чичирхийлэл (aftershock) бүртгэгдээд байгаа бөгөөд газар хөдлөлтийн дараахь чичирхийлэл нь тодорхойгүй хугацаа (өдөр, сар)-гаар үргэлжилдэг тул иргэд Та бүхэн болзошгүй эрсдэлээс урьдчилан сэргийлж, Элчин сайдын яамны бүртгэлт идэвхтэй хамрагдана уу. Бүртгэлийн холбоос:

https://docs.google.com/forms/d/e/1FAIpQLSeMLLAO9YRpxAkT0EREEL3VxGwjvdug-u_YKebk8S1847646A/viewform?usp=header

 

ГАЗАР ХӨДЛӨХ ҮЕД АНХААРАХ ЗҮЙЛС

Хэрэв Та газар хөдлөлтийн үед барилга, байгууламж дотор байгаа бол:

  • Газар хөдлөх үед тайван байж, үймж сандрахгүй байх;
  • Аюулгүй газар хорогдох, дотор хана, булан, даацын багана хэсэгт өөрийгөө халхлах хатуу, бат бөх ширээ, тавцангийн доор нуугдах, толгойгоо хамгаалах;
  • Цонх, таазны гэрэл, эсхүл дээрээс унах зүйлээс хол байх;
  • Цахилгаан шатаар зорчихоос зайлсхийж, явган шат ашиглах.

Хэрэв Та газар хөдлөлтийн үед гадна талбайд байгаа бол:

  • Өндөр байшин, барилга, мод, гэрэл болон цахилгааны шонгоос хол байх;
  • Тээврийн хэрэгслээр зорчиж байгаа бол замаас гарч зогсох, газар доогуурх зам, гүүрэн байгууламжаас хол байх;
  • Цахилгааны болон төрөл бүрийн шугам, сүлжээний утас тасрах, энэ үед урьдчилан таамаглах боломжгүй эрсдэл учрах магадлал өндөр тул анхаарал, сонор сэрэмжтэй байх.

Газар хөдлөлтийн үед:

  • Орон сууц, хотхоны зохион байгуулалтын албанаас тухайн барилгад эрсдэлийн үнэлгээ хийж, дүгнэлт гаргах хүртэл аливаа барилгад нэвтрэхгүй байх;
  • Ажиллаж, амьдарч буй газрын ойролцоох аюулгүй бүс, задгай талбайг тодорхойлж, хэрэглээний зүйл, нэн ялангуяа эм, эмнэлгийн анхан шатны тусламжийн хайрцаг, шингэн уух зүйл, гар утас, харилцаа холбооны хэрэгслийн хэвийн үйл ажиллагааг хангах, зөөврийн зай хураагуур, бичиг баримт, бэлэн мөнгө болон бусад шаардлагатай зүйлийг биедээ авч явах;
  • Гэнэтийн аюулын үед замын хөдөлгөөний ачаалал нэмэгддэг тул зорчих хөдөлгөөнөө оновчтой төлөвлөх;
  • Элчин сайдын яам болон гэр бүл, найз нөхөд, ойр дотнын хүнтэй холбогдож, мэдээлэл өгөх.

 Газар хөдлөлтийн дараа:

  • Эмнэлгийн анхан шатны тусламж авах;
  • Төрийн холбогдох байгууллага болон Элчин сайдын яамны зөвлөмж, мэдээллийг дагах, зэрэг болно.

Түүнчлэн дараахь гар утасны программыг суулгаж, цаг үеийн мэдээ, мэдээллийг авна уу. Үүнд:

  1. Тайландын газар хөдлөлтийг ажиглах газрын цахим хуудас:

https://earthquake.tmd.go.th/,

    1. “Google Play”: https://play.google.com/store/apps/details?id=app.android.tmd.earthquake.earthquaketmd&pli=1
    1. “App Store”:

https://apps.apple.com/th/app/earthquaketmd/id1537054505

  1. “Line Alert”: https://line.me/R/ti/p/@016dgydw

Элчин сайдын яамны шуурхай утас: +66 06-1026-9692, +66 83-886-3626, +66 98-828-1096.

 

 

 

МОНГОЛ УЛСААС

ТАЙЛАНДЫН ХААНТ УЛСАД СУУГАА

ЭЛЧИН САЙДЫН ЯАМ