ИРГЭДИЙН АНХААРАЛД-ГАЗАР ХӨДЛӨЛТИЙН ҮЕД АВАХ АРГА ХЭМЖЭЭ

Өчигдөр буюу 2025 оны 03 дугаар сарын 28-ны Баасан гарагт Мьянмарын Холбооны Бүгд Найрамдах Улсын Сагайнг хотод болсон 7.7 магнитудын хүчтэй газар хөдлөлтийн чичирхийлэл Тайландын Хаант Улсын нийслэл Бангкок хотод хүчтэй мэдрэгдэж, Чатучак, Дин Дэйнг болон Банг Суэ дүүрэгт баригдаж байсан барилга нурж, аврах ажиллагааг үргэлжлүүлж байгааг тус хотын Захирагчийн албанаас мэдээлэв.

Газар хөдлөлтийн чичирхийллийн улмаас Бангкок хотод олон тооны барилга, байгууламж, тэр дундаа нийтийн орон сууцанд их хэмжээний цууралт үүссэн, мөн сүүлийн 24 цагийн хугацаанд болсон үйл явдалтай холбогдуулан дараахь зөвлөмжийг хүргүүлж байна. Үүнд:

​Хэрэв Та газар хөдлөлтийн үед барилга, байгууламж дотор байгаа бол:

- Газар хөдлөх үед тайван байж, үймж сандрахгүй байх;

- Аюулгүй газар хорогдох, дотор хана, булан, даацын багана хэсэгт өөрийгөө халхлах хатуу, бат бөх ширээ, тавцангийн доор нуугдах, толгойгоо хамгаалах;

- Цонх, таазны гэрэл, эсхүл дээрээс унах зүйлээс хол байх;

- Цахилгаан шатаар зорчихоос зайлсхийж, явган шат ашиглах.

Хэрэв Та газар хөдлөлтийн үед гадна талбайд байгаа бол:

- Өндөр байшин, барилга, мод, гэрэл болон цахилгааны шонгоос хол байх;

- Тээврийн хэрэгслээр зорчиж байгаа бол замаас гарч зогсох, газар доогуурх зам, гүүрэн байгууламжаас хол байх;

- Цахилгааны болон төрөл бүрийн шугам, сүлжээний утас тасрах, энэ үед урьдчилан таамаглах боломжгүй эрсдэл учрах магадлал өндөр тул анхаарал, сонор сэрэмжтэй байх.

Газар хөдлөлтийн үед:

- Орон сууц, хотхоны зохион байгуулалтын албанаас тухайн барилгад эрсдэлийн үнэлгээ хийж, дүгнэлт гаргах хүртэл аливаа барилгад нэвтрэхгүй байх;

- Ажиллаж, амьдарч буй газрын ойролцоох аюулгүй бүс, задгай талбайг тодорхойлж, хэрэглээний зүйл, нэн ялангуяа эм, эмнэлгийн анхан шатны тусламжийн хайрцаг, шингэн уух зүйл, гар утас, харилцаа холбооны хэрэгслийн хэвийн үйл ажиллагааг хангах, зөөврийн зай хураагуур, бичиг баримт, бэлэн мөнгө болон бусад шаардлагатай зүйлийг биедээ авч явах;

- Гэнэтийн аюулын үед замын хөдөлгөөний ачаалал нэмэгддэг тул зорчих хөдөлгөөнөө оновчтой төлөвлөх;

- Элчин сайдын яам болон гэр бүл, найз нөхөд, ойр дотнын хүнтэй холбогдож, мэдээлэл өгөх.

Газар хөдлөлтийн дараа:

- Эмнэлгийн анхан шатны тусламж авах;

- Төрийн холбогдох байгууллага болон Элчин сайдын яамны зөвлөмж, мэдээллийг дагах;

- Бангкок хотод богино болон урт хугацаагаар орон сууц хөлсөлж буй иргэд Та бүхэн амьдарч буй байрныхаа эвдрэл, гэмтэл, цууралтыг гэрэл зургаар баталгаажуулан байр түрээслүүлэгч, эсхүл амьдарч буй байр, хотхоныхоо зохион байгуулалтын албанд мэдэгдэж, гарч болзошгүй санхүүгийн эрсдэлээс урьдчилан сэргийлнэ үү. Байранд үүссэн цууралтыг байрныхаа зохион байгуулалтын албанд мэдэгдсэнээр Бангкок хотын захиргаанаас мэргэжлийн баг илгээж, аюулгүй байдлын шалгалт хийж байгаа болно.

Бангкок хотод үүссэн нөхцөл байдалтай холбогдуулан хотын Захирагчийн албанаас

1. Бенчасири (https://maps.app.goo.gl/muWKQX4mft7E3EKA8) цэцэрлэгт хүрээлэн,

2. Бенжакити (https://maps.app.goo.gl/pg3pfizX2btv63zHA) цэцэрлэгт хүрээлэн,

3. Лумпини (https://maps.app.goo.gl/fsC6BMFAMTwQjhAS9) цэцэрлэгт хүрээлэн,

4. Чатучак (https://maps.app.goo.gl/2JiiHbpSjBMJEeaG8) цэцэрлэгт хүрээлэнд 24/7 түр хоргодох байр ажиллуулж байгаа бөгөөд олон улсын байгууллагаас хүргүүлж буй дараахь зөвлөмжийг анхаарна уу. Үүнд:

- Сонор сэрэмжтэй байж, НҮБ-ын Хамгаалалт, аюулгүй байдлын газар болон тайландын Засгийн газрын албан ёсны эх сурвалж, мэдээллийг дагаж мөрдөх,

- Оршин суугаа байр болон ажлын байрны эвдрэл, гэмтлийг яаралтай холбогдох газарт мэдээллэх,

- Орон нутгийн засаг захиргаа, барилгын удирдлага, ялангуяа нүүлгэн шилжүүлэлт, барилгын шалгалттай холбоотой бүх зааврыг дагаж мөрдөх,

- Чатучак цэцэрлэгт хүрээлэнгийн ойролцоох нурсан барилгын ойр орчмоос зайлсхийх, зэрэг болно.

Элчин сайдын яамны шуурхай утас: +66 06-1026-9692, +66 83-886-3626, +66 98-828-1096.

МОНГОЛ УЛСААС ТАЙЛАНДЫН ХААНТ УЛСАД СУУГАА ЭЛЧИН САЙДЫН ЯАМ