ИРГЭДИЙН АНХААРАЛД
Тайландын Хаант Улсын Засгийн газраас сүүлийн үед тус улсын өсвөр үеийнхний дунд газар авч буй халаадаг болон цахилгаан тамхины эрэлт, нийлүүлэлт дэх хяналт, шалгалтыг сайжруулж, энэ төрлийн тамхийг бусдад худалдсан, бусдаас худалдан авсан, хадгалсан, хэрэглэсэн этгээдэд оногдуулах ялын бодлогыг чангатгах замаар хэрэглээг бүрмөсөн хориглох шийдвэрийг гаргаад байна.
Тайландын Хаант Улс нь халаадаг болон цахилгаан тамхи, тэдгээрийн дагалдах хэрэгсэл (никотины агууламжтай хатуу болон шингэн төлөвт тамхи)-ийг улсын хилээр нэвтрүүлэх, бусдад худалдах, бусдаас худалдан авахыг 2014 онд хуулиар хориглосон бөгөөд энэ төрлийн тамхинд хориг тавьсан дэлхийн 33 улсын нэг юм.
Тус улсад байх хугацаандаа халаадаг болон цахилгаан тамхи, тэдгээрийн дагалдах хэрэгслийг бусдад худалдсан, бусдаас худалдан авсан, хадгалсан, улсын хилээр нэвтрүүлсэн, хэрэглэсэн тохиолдолд хуулийн дараахь хариуцлагыг хүлээнэ. Үүнд:
- “Хэрэглэгчийн эрхийг хамгаалах тухай хууль”-д заасны дагуу халаадаг болон цахилгаан тамхи, тэдгээрийн дагалдах хэрэгслийг бусдад худалдсан этгээдэд гурван жил хүртэлх хугацаагаар хорих ял, мөн 600,000 тай баат-ын мөнгөн торгууль,
- “Гаалийн тухай хууль”-д заасны дагуу халаадаг болон цахилгаан тамхи, тэдгээрийн дагалдах хэрэгслийг бусдаас худалдаж авсан, эсхүл хадгалсан этгээдэд таван жил хүртэлх хугацаагаар хорих ял, мөн тухайн бүтээгдэхүүний нийт үнийн дүнг дөрөв дахин нэмэгдүүлсэн хэмжээний мөнгөн торгууль,
- “Гаалийн тухай хууль”-д заасны дагуу халаадаг болон цахилгаан тамхи, тэдгээрийн дагалдах хэрэгслийг улсын хилээр нэвтрүүлсэн этгээдэд арван жил хүртэлх хугацаагаар хорих ял, мөн тухайн бүтээгдэхүүний нийт үнийн дүнг тав дахин нэмэгдүүлсэн хэмжээний мөнгөн торгууль,
- “Тамхины хяналтын тухай хууль”-д заасны дагуу олон нийтийн газар халаадаг болон цахилгаан тамхи хэрэглэсэн этгээдэд 5,000 тай баат-ын мөнгөн торгууль оногдуулах тул иргэд Та бүхэн тус улсад байх хугацаандаа дотоодын хууль, дүрмийг чанд сахиж, хариуцлагатай аялахыг зөвлөж байна.
МОНГОЛ УЛСААС
ТАЙЛАНДЫН ХААНТ УЛСАД СУУГАА
ЭЛЧИН САЙДЫН ЯАМ