ТАЙЛАНДЫН ХААНТ УЛС 2028 ОНД F1-ИЙН УРАЛДААНЫГ ЗОХИОН БАЙГУУЛАХААР ЗОРЬЖ БАЙНА

Ерөнхий сайд Пэтонгтан Чинават энэ Мягмар гарагт Формула-1 (F1)-ийн тэргүүн Стефано Доменикали-тай уулзаж, Засгийн газраас 2028 оноос Бангкок хотноо Гран При уралдаан зохион байгуулах ТЭЗҮ судалгаа хийхээр болсныг мэдэгджээ. F1 нь дэлхий дахинаа нийт 24 уралдаан зохион байгуулах хуваарьтай бөгөөд үүнээс Ази, Номхон далайн бүс нутагт дөрөв буюу үүнд Зүүн Өмнөд Азид зохиогддог Сингапурын Гран При уралдаан багтдаг. Тайландын Хаант Улс Олон улсын автомашины холбоо (FIA)-ны магадлан итгэмжлэгдсэн уралдааны замтай бөгөөд энэ нь тус улсын зүүн хойд бүс нутгийн Бури Рам мужид байрладаг. Уг мужид одоогоор MotoGP мотоциклын дэлхийн аварга шалгаруулах тэмцээний нэг гарааг зохион байгуулдаг. Гэхдээ F1 уралдааныг нийслэл Бангкок хотод буюу гудамжны уралдаан зохион байгуулахаар төлөвлөж байгаа ажээ.

Ерөнхий сайд Пэтонгтан Засгийн газрын ордонд Формула1-ийн Гүйцэтгэх захирал Доменикали-тэй уулзсаныхаа дараа өөрийн X (Twitter) хуудаснаа, “Тайландын Хаант Улсад дэлхий дахинаа олон үзэгч, шүтэн бишрэгчидтэй гайхалтай спорт болох Формула-1 уралдааныг зохион байгуулах боломжийн талаар ярилцах завшаан тохиолоо” гэж бичжээ. Формула1-ийн Гүйцэтгэх захирал Доменикали мөн өөрийн X хуудаснаа, Бангкок дахь уралдааныг зохион байгуулах төлөвлөгөөг "сэтгэл хөдөлгөм" хэмээн тодорхойлж, “Ирэх долоо хоног, сард бид яриа хэлцээгээ үргэлжлүүлэх болно” гэж мэдэгджээ.

Эх сурвалж: Bangkok Post