ТРАМПЫГ ЗҮҮН АЗИЙН ДЭЭД ХЭМЖЭЭНИЙ УУЛЗАЛТАД УРЬЖЭЭ

Малайзын Ерөнхий сайд Датук Сери Анвар Ибрахим АНУ-ын Ерөнхийлөгч Дональд Трампыг энэ оны сүүлчээр болох Зүүн Азийн дээд хэмжээний уулзалтад оролцохыг урьсан тухай мэдэгджээ. Ерөнхий сайд хэлэхдээ энэ мэдээллийг АНУ-аас Малайз Улсад суугаа Элчин сайд Эдгард Д. Каган-д уламжилсан гэжээ. Өчигдөр орой буюу энэ 3 дугаар сарын 11-ний өдөр Ерөнхий сайд Анвар Путражая дахь ажлын өрөөндөө АНУ-ын Элчин сайдыг хүлээн авч уулзжээ. Тэрбээр хэлэхдээ “Бид АСЕАН-ныг даргалахтай холбоотой асуудлыг онцлон ярилцаж, ялангуяа АСЕАН-АНУ-ын тусгай дээд хэмжээний уулзалтын талаар ярилцсан. Малайзын Засгийн газар Ерөнхийлөгч Трампыг энэ оны эцэст болох Зүүн Азийн дээд хэмжээний уулзалтад оролцохыг урьсан” гэж тэрбээр Facebook хуудсандаа мэдээлжээ. Түүнчлэн уг уулзалтын үеэр хоёр улсын харилцааны талаар дэлгэрэнгүй ярилцаж, халал гэрчилгээний асуудлаас гадна эдийн засаг, технологийн хамтын ажиллагааны талаар ярилцсан тухай дурджээ.

Малайз Улс энэ жилээс АСЕАН-ны даргын үүргийг албан ёсоор хүлээж авсан. АНУ-ын Ерөнхийлөгч Дональд Трамп анх 2017 онд, Филиппин Улс АСЕАН-ныг даргалж байх үед АСЕАН-ны Дээд хэмжээний уулзалтад оролцсон. Гэвч түүнээс хойших АСЕАН-ны уулзалтад оролцоогүй аж. Өнгөрсөн 2 дугаар сард Малайзын Гадаад хэргийн сайд Датук Сери Мохамад Хассан хэлэхдээ Малайз Улс АСЕАН-АНУ-ын тусгай дээд хэмжээний уулзалт зохион байгуулах чиглэлээр ажиллаж байна гэж мэдэгджээ. АНУ нь Малайзын гурав дахь том худалдааны түнш бөгөөд энэ оны нэгдүгээр сарын байдлаар 17.25 тэрбум ринггитийн экспорт хийжээ.

Эх сурвалж: The Star