ХЭВЛЭЛИЙН МЭДЭЭ
Монгол Улсаас Тайландын Хаант Улсад суугаа Онц бөгөөд Бүрэн эрхт Элчин сайд А.Төмөр 2025 оны 02 дугаар сарын 24-ний өдөр Тайландын Хаант Улсын Хууль зүйн сайд, Цагдаагийн хурандаа Тавий Содсонг-той хоёр талын уулзалт хийж, хамтын ажиллагааны зарим асуудлаар санал солилцов.
Элчин сайд А.Төмөр Монгол Улс тус улстай худалдаа, эдийн засаг, хөрөнгө оруулалт, аялал жуулчлал, соёл, боловсрол, эрх зүйн хамтын ажиллагааг өргөжүүлэх, иргэд солилцоог нэмэгдүүлэхэд анхаарч байгааг тэмдэглээд тус улсыг зорих монгол иргэдийн тоо нэмэгдэж байгаатай холбогдуулан иргэдийн хууль ёсны эрх ашгийг хамгаалах, хоёр улсын хууль сахиулах байгууллага хооронд хамтын ажиллагааны механизм байгуулах саналыг дэвшүүлэв.
Тайландын Хаант Улсын Хууль зүйн сайд, Цагдаагийн хурандаа Тавий Содсонг дээрх саналыг хүлээн авч байгаагаа илэрхийлж, хоёр улсын Хууль зүйн яам болон тэдний харьяа байгууллага хооронд хамтын ажиллагааны механизм байгуулснаар үндэстэн дамнасан гэмт хэрэг, мансууруулах, сэтгэцэд нөлөөт бодис, цахим залилан, хууль бус цахим дуудлагын төвтэй үр дүнтэй тэмцэх, хууль сахиулах байгууллага хооронд харилцан туршлага, мэдээлэл солилцох, эрх зүйн туслалцаа үзүүлэх, алба хаагчдыг бэлтгэх чухал ач холбогдолтойг онцолж, Монгол Улсын Хууль зүй, дотоод хэргийн сайд О.Алтангэрэлийг тааламжтай цагтаа Тайландын Хаант Улсад айлчлахыг урив.
МОНГОЛ УЛСААС
ТАЙЛАНДЫН ХААНТ УЛСАД СУУГАА
ЭЛЧИН САЙДЫН ЯАМ