ТАЙЛАНДЫН ХААНТ УЛСЫН ИХЭНХ ХЭСЭГТ АГААРЫН ТЕМПЕРАТУР НЭМЭГДЭХ ТӨЛӨВТЭЙ БАЙНА

Тайландын Хаант Улсын Цаг уурын газраас тус улсын хойд болон өмнөд хэсэгт агаарын температур нэмэгдэх, мөн аянга цахилгаантай аадар бороо үргэлжлэн орохыг анхааруулж, тухайн бүс нутгийн иргэдийг анхаарал, сонор сэрэмжтэй байхыг сануулав. Тус газрын мэдээлснээр зүүн хойд бүс нутаг болон Өмнөд хятадын тэнгис орчимд агаарын өндөр даралтын хэмжээ сул, мөн зүүн, зүүн өмнөд бүс нутагт салхины хурд нэмэгдэж байгаа нь цаг агаарын тогтворгүй байдлыг бий болгож байгааг онцлов. Харин Тайландын булан болон Андаманы тэнгис орчимд салхины хурд буурч байгаа нь тус улсын өмнөд хэсэгт хур тунадасны хэмжээ буурах төлөвтэй байгаа гэж мэдэгдэв.  

Тайландын Цаг уурын газрын мэдээнд дурдсанаар тус улсын хойд, зүүн хойд, төв, зүүн бүсийн агаарын температур цельсийн 34-38 градус, өмнөд бүсийн агаарын температур цельсийн 33-34 градус байгаа бол нийслэл Бангкок хот орчмын агаарын температур цельсийн 35-37 градус байна.

Эх сурвалж: The Nation Thailand