ЕРӨНХИЙ САЙД ПЕТОНГТАН МАРГААШ ҮНДЭСНИЙ ХЭМЖЭЭНД ЭДИЙН ЗАСГИЙН ТУСЛАМЖ ҮЗҮҮЛЭХ КАМПАНИТ АЖИЛ ЭХЛҮҮЛНЭ

Ерөнхий сайд Петонгтан Чинават энэ Лхагва гарагт эдийн засгийг сэргээх кампанит ажил эхлүүлэх бөгөөд энэ нь амьжиргааны өртгийг бууруулахад туслах бараа бүтээгдэхүүнийг хямдралтай үнээр санал болгох зорилготой юм. Энэхүү кампанит ажил нь ирэх оны 1 дүгээр сар хүртэл үндэсний хэмжээнд үргэлжлэх хэдий ч өнгөрсөн сараас эхлэн сонгогдсон газарт туршилтын журмаар хэрэгжиж эхэлсэн гэдгийг Худалдааны сайд Пичай Нариптафан энэ Мягмар гарагт мэдэгджээ. Тэрбээр мөн тус аяныг Худалдаа, Батлан ​​хамгаалах, Дотоод хэрэг, Санхүү, Цахим эдийн засаг, Нийгэм болон Нийтийн эрүүл мэндийн яамдтай хамтран эхлүүлж байгаа гэв.

Түүнчлэн Худалдаа аж үйлдвэрийн танхим, Худалдааны зөвлөл, Тайландын аж үйлдвэрийн холбоо, Тайландын жижиглэн худалдаа эрхлэгчдийн холбоо зэрэг бизнесийн холбоод болон жижиглэнгийн болон бөөний худалдааны бизнес эрхлэгчид, конвиниенс дэлгүүр, шатахуун түгээх станцын оператор нэгдэж оролцож байгаа гэв.

Тэрбээр энэхүү кампанит ажил нь эмзэг бүлгийнхэнд туслах, дотоодын зарцуулалт болон эдийн засгийг бүхэлд нь дэмжих зорилготой Засгийн газрын 10,000 баат түгээх хөтөлбөрийн үргэлжлэл гэдгийг тайлбарлаж хэлэв. Түүнчлэн энэ Лхагва гарагт болох нээлтийн ажиллагааны үеэр Ерөнхий сайд Петонгтан дотоодын бизнес эрхлэгчидтэй шууд нэвтрүүлэгт оролцох болно гэв. Уг нээлтийн арга хэмжээг Кон Кэен, Лопбури, Удон Тани, Пхукет, Чианг Рай зэрэг таван газраас шууд дамжуулах ажээ.

Эх сурвалж: The Nation Thailand