ГАДААД ПАСПОРТ

2025-01-08

Гадаад паспорт дараах байдлаар захиалах боломжтой: Үүнд:         

1. Элчин сайдын яамаар дамжуулан захиалах. /Хугацаа: 45-60 хоног зарцуулагдана./

2. Монгол дахь төлөөлөгчөөрөө дамжуулан Итгэмжлэл үүсгэн захиалах.

1.Элчин сайдын яамаар дамжуулан захиалах.

Тайландын Хаант Улс, Малайз Улс, Мьянмарын Холбооны Бүгд Найрамдах Улс, Камбожийн Хаант Улсад ажиллаж, амьдарч буй Монгол Улсын иргэн Таны гадаад паспортын хүчинтэй хугацаа дууссан, визийн хуудас дууссан, vрэгдvvлсэн, эсхүл гэмтээсэн тохиолдолд үндэсний энгийн гадаад паспорт шинээр захиалан авч болно.

Гадаад паспорт шинээр захиалан авахад бүрдүүлэх бичиг баримт. Үүнд:

  • Гадаад паспорт шинээр авах мэдүүлгийг татан авч, үнэн зөв, бүрэн гүйцэт бөглөх.
  • Гадаад паспорт авах тухай хүсэлтээ илэрхийлж, Элчин сайдын яамны нэр дээр өргөдөл гаргах (загварыг татан авч, үнэн зөв, бүрэн гүйцэт бөглөнө).
    • Жич: Өргөдлийг монгол хэл дээр гаргах бөгөөд өргөдөлд өмнө нь хэрэглэж байсан гадаад паспортаа алдаж үрэгдүүлсэн, эсхүл гэмтээсэн бол шалтгааныг тодорхой тусгаж, өөрийн амьдарч буй хаяг, холбоо барих утасны дугаар, цахим шуудангийн хаяг зэргийг тодорхой дурьдана.
  • Паспортаа алдаж үрэгдүүлсэн тохиолдолд үүнийг магадласан цагдаагийн байгууллага (цагаачлалын алба)-ын тодорхойлолт/ бүртгүүлсэн тухай бүртгэлийн хуудас
  • Одоо ашиглаж байгаа гадаад паспорт байхгүй тохиолдолд иргэний цахим vнэмлэх, шинээр төрсөн хүүхдэд захиалах тохиолдолд төрсний гэрчилгээний хуулбарыг хавсаргана.
  • Төлбөрийн баримт (Үйлчилгээний хураамж харах)
  • Сүүлийн 3 сарын дотор авахуулсан 531 x 413 pixel хэмжээтэй зургийг .JPEG өргөтгөлтэй файлаар илгээх, эсхүл www.photo.burtgel.gov.mn цахим хуудаст өөрөө хуулж, оруулах боломжтой.
    • Жич: Цагаан дэвсгэртэй, малгай, алчуур, нүдний шилгүй, эгц урдаасаа харсан, чих, духны хэсэг ил гарсан, зурагнаас буулгаагүй, дүрэмт хувцасгүй авахуулсан зураг байх ёстой. Зурагт тавигдах шаардлагыг дор зургаар үзүүлэв.

Тайлбар:

  • Элчин сайдын яам гадаад паспортыг өөрөө шууд олгодоггүй бөгөөд хүсэлт гаргагчаас ирүүлсэн материалыг Улсын бүртгэлийн ерөнхий газарт хүргүүлдэг.
  • Гадаад паспортын сунгалтын үйлчилгээ хийгдэхгүй тул хэрэв гадаад паспортын хугацаа дуусч байгаа бол шинэ гадаад паспорт захиалж авна.
  • Хүсэлт гаргасан иргэнд гадаад паспорт олгох эсэх асуудлыг Улсын бүртгэлийн ерөнхий газар материал хүлээн авсан өдрөөс хойш 7-14 хоногт шийдвэрлэдэг бөгөөд олгох тохиолдолд паспортын бичилтийг хийж, баталгаат шуудангаар Элчин сайдын яаманд ирүүлдэг.
  • Элчин сайдын яаманд хэвлэгдэн ирсэн паспортыг тамга, гарын үсгээр баталгаажуулж, хүсэлт гаргагч иргэнд олгоно. Энэ ажлаас шалтгаалж шинээр паспорт авахад дунджаар 1-2 хүртэлх сарын хугацаа шаардагддаг болно.

Анхаарах зүйлс:

  • Гадаад паспорт шинээр болон дахин авч буй иргэд Иргэний шинэчилсэн бүртгэл (биеийн давхцахгүй өгөгдлийн)-д бүртгүүлсэн байх ёстой. Бүртгүүлэх шаардлагатай эсэхээ иргэний үнэмлэхний хүчинтэй хугацааг шалгаж мэдэх боломжтой. Тодруулбал, 16 нас хүрсэн иргэн иргэний үнэмлэх аваагүй бол, эсвэл 25 болон 45 нас хүрсэн иргэн шинэчилсэн бүртгэлдээ дахин хамрагдаж иргэний үнэмлэхээ сунгуулаагүй бол гадаад паспорт олгогдохгүй.
  • Алдагдсан болон гэмтсэн паспорт олон улсад хүчингүй болж зарлагдах тул дахин ашиглах боломжгүй.
  • Шинээр гадаад паспорт захиалж авахад 45-60 хоног хүртэл хугацаанд хүлээгддэг.
  • Гадаад паспорт шинээр авах мэдүүлгийг буруу, эсхүл дутуу бөглөсөн байдаг. 

 

2. Монгол дахь төлөөлөгчөөрөө дамжуулан Итгэмжлэл үүсгэн захиалах

Та гадаад паспорт яаралтай захиалах шаардлагатай бол Монгол Улсад оршин суугаа иргэнд итгэмжлэл олгон гадаад паспортын захиалгыг шуурхай гүйцэтгүүлэх боломжтой. Үүнд:

  • 2.1.Итгэмжлэгдсэн төлөөлөгчөөр дамжуулан гадаад паспорт шинээр захиалж буй иргэд дараах холбоосоор нэвтрэн орж итгэмжлэл үүсгэн ЭСЯ-ны албан хаагчаар хянан баталгаажуулна.

2.2. Итгэмжлэгдэгсэн төлөөлөгч уг итгэмжлэлийг өөрт ойрхон байрлах дурын нотариатын газраас иргэний бичиг баримттайгаа өөрийн биеэр очиж итгэмжлэлээ хүлээн авч, Улаанбаатар хот дахь УБЕГ-ын өөрт ойрхон нэг цэгийн үйлчилгээний төвд хандан Таны өмнөөс шинэ гадаад паспорт захиалах боломжтой.

Ийнхүү итгэмжлэлээр паспорт захиалж байгаа тохиолдолд шинэ гадаад паспорт авахад тавигддаг хэмжээ, өнгө дүрсний чанар шаардлагыг сайтар хангасан өөрийн цээж зургийг итгэмжилсэн хүндээ файл хэлбэрээр нь илгээх шаардлагатайг анхаарна уу. Улаанбаатар хотод паспорт захиалах заавар, цээж зургийн шаардлага, үйлчилгээний үнийн талаар эндээс  уншиж танилцана уу.

 

Жич: Шинээр авсан гадаад паспортыг тухайн улсын шилжилт хөдөлгөөний байгууллагад бүртгүүлэх зайлшгүй шаардлагатай. Учир нь шинэ паспорт нь тухайн улсын хилээр нэвтэрсэн тэмдэглэгээгүй тул эрх зүйн сөрөг үр дагавар дагуулна.

 

ГАДААД ПАСПОРТЫН ХҮЧИНТЭЙ ХУГАЦААГ СУНГАХГҮЙ

Засгийн газрын 2017 оны 94 дүгээр тогтоолын хэрэгжилтийг хангах зорилгоор хилийн чанадад суугаа дипломат төлөөлөгчийн газрууд 2018 оны 1 дүгээр сарын 3-ны өдрөөс эхлэн Үндэсний энгийн гадаад паспортын хүчинтэй хугацааг сунгахгүй болсныг үүгээр мэдэгдэж байна.

 

Хавсралт