ТАЙЛАНДЫН ХААНТ УЛСЫН АЖ АХУЙН НЭГЖ, БАЙГУУЛЛАГА МОНГОЛ УЛСАД ХАМТЫН АЖИЛЛАГААНЫ ШИНЭ ТҮНШЛЭЛИЙГ БИЙ БОЛГОНО

Тайландын Хаант Улсын тэргүүлэх зарим аж ахуйн нэгж, байгууллагын төлөөлөл энэ 2025 оны 08 дугаар сарын 01-02-ны өдөр Монгол Улсад ажлын айлчлал хийв. Айлчлалын хүрээнд Монгол Улсаас Тайландын Хаант Улсын Пукет, Панг-Нга мужид суугаа Өргөмжит консул П.Наттапон тэргүүтэй Тайландын Соёл, урлагийн зөвлөл, “Bumrungrad” олон улсын эмнэлэг, “Bangkok (BDMS)” эмнэлэг, “MEDEZE” групп, “Bangkok Aviation Fuel Services (BAFS)”, “Star Money”, “Nextgoal Business and Consultant” болон “VST ECS” зэрэг аж ахуйн нэгж, байгууллагын төлөөлөл Монгол Улсын Зам, тээврийн хөгжлийн сайд Б.Дэлгэрсайхантай хоёр талын уулзалт хийж, хамтын ажиллагааны зарим асуудлаар санал солилцов. Уулзалтаар Өргөмжит консул П.Наттапон тайландын аж ахуйн нэгж, байгууллага Монгол Улстай эрүүл мэнд, гоо сайхан, аялал жуулчлалын салбарын хамтын ажиллагааг бэхжүүлэх сонирхолтой байгааг илэрхийлээд, Монгол Улстай харилцан ашигтай хамтын ажиллагааг хөгжүүлэх, ялангуяа нисэх онгоцны буудлын өргөтгөл болон хоёр улсын хооронд байнгын шууд нислэг тогтоох боломжийн талаар санал солилцов. Өргөмжит консул П.Наттапон тэргүүтэй тайландын аж ахуйн нэгж, байгууллагын энэхүү ажлын айлчлал нь хоёр улсын хооронд дипломат харилцаа тогтоосны 51 жилийн ойн хүрээнд болж байгаагаараа онцлог юм.

Эх сурвалж: The Nation Thailand