ТАЙЛАНДЫН ХААНТ УЛС ДЭЛХИЙН ЧИГ ХАНДЛАГЫГ АНХААРАЛТАЙ АЖИГЛАЖ БАЙНА
Тайландын Засгийн газар АНУ-ын эдийн засгийн хэтийн төлөв байдал болон дэлхийн эдийн засгийн хямрал болж болзошгүй байдлыг анхааралтай ажиглаж, түүний экспортод үзүүлэх нөлөөллийг бууруулах төлөвлөгөөгөө эрчимжүүлж байгаа аж. Тус улсын Худалдааны сайд Пумтам Вечаячай хэлэхдээ, Худалдааны яам АНУ-ын эдийн засгийн хэтийн төлөв байдлыг анхааралтай ажиглаж байгаа бөгөөд энэ нь тус улс эдийн засгийн хямралд орох, улмаар дэлхийн зах зээлийг ихээхэн уналтад хүргэх эрсдэлд хүргэж болзошгүй гэсэн болгоомжлолыг үүсгэж байна. "Засгийн газар Тайландын бизнес эрхлэгчид болон хэрэглэгчдийг хохироохыг зөвшөөрөхгүй. Бид зөвхөн АНУ-ын нөлөөг төдийгүй дэлхий дахины бүх нөхцөл байдлыг ажиглаж байна. Дэлхий дахинаа гарах өөрчлөлтөд дасан зохицоход нь туслахын тулд жижиг, дунд, том бизнес эрхлэгчидтэй хамтран ажиллаж, уулзалт хийж байна. Тус яамнаас гарц шийдлийг эрэлхийлж байгаа бөгөөд явцын талаар мэдээлэл өгөх болно" гэж тэрбээр хэлэв. Худалдааны сайд Пумтам хэлэхдээ, тус яам дэлхийн шинэ дэг журамтай холбоотой улс төрийн нөхцөл байдал, эдийн засгийн нөхцөл байдал, дайн зэрэг нь экспортод саад тотгор учруулж байгааг ойлгож, болзошгүй үр дагаварт хэдийнээ бэлтгэлтэй байгаа гэжээ.
Түүнчлэн тэрбээр хэлэхдээ, Худалдааны яам нь Аж үйлдвэрийн яам, Нийгмийн эрүүл мэндийн яам зэрэг эдийн засгийн асуудал хариуцдаг яам, агентлагийг хуралдуулж, импорт экспортын стандартыг хэлэлцэхээр төлөвлөж байгаа гэв. Эдгээр хэлэлцүүлгээр аж үйлдвэр болон хүнс, эмийн удирдлагын стандартыг ярилцах аж. Хэлэлцүүлгийн зорилго нь Дэлхийн худалдааны байгууллагын хэлэлцээрийг зөрчихгүйгээр аливаа асуудал, хүндрэл бэрхшээлд хяналт тавих, урьдчилан сэргийлэх арга замыг эрэлхийлэх болон саад учруулж буй хууль тогтоомжид өөрчлөлт оруулахад чиглэнэ гэж тэрбээр хэлэв.
Тайландын аж үйлдвэрийн холбооны тэргүүн Криенгкраи Тиеннукул хэлэхдээ, хэрвээ АНУ-ын эдийн засаг уналтад орвол Тайландын экспортлогчид болон аж үйлдвэрлэлийн салбарын бизнес эрхлэгчдэд ноцтой үр дагавар үзүүлж болзошгүйг анхааруулав. "Энэхүү шинэ хямралд хамгийн түрүүнд экспортын салбар, дараа нь үйлдвэрлэгчид өртөх болно" гэж тэрбээр хэлжээ.
Эх сурвалж: Bangkok Post