ЕРӨНХИЙ САЙД ИЛҮҮ ОЛОН ЧАДВАРЛАГ МЭРГЭЖИЛТЭНГ ТАТАХЫН ТУЛД ВИЗНИЙ ДЭГЛЭМИЙГ ӨӨРЧЛӨХ НЬ ЗҮЙТЭЙ ГЭЖ ҮЗЭЖ БАЙНА
Тайландын Хаант Улсын Засгийн газраас эдийн засгийн өсөлтийг эрчимжүүлэх, тогтвортой байлгах урт хугацааны стратегийн хүрээнд гадаадын чадварлаг мэргэжилтний төв болж, тус улсын өрсөлдөх чадварыг нэмэгдүүлэхээр зорьж байна. Засгийн газрын хэвлэлийн төлөөлөгч Чай Вачаронке энэ Мягмар гарагт хэлэхдээ, Ерөнхий сайд Сетта Тависин гадаадын чадварлаг боловсон хүчнийг татахын тулд илүү олон төрлийн визний ангилал нэвтрүүлэх замаар тус улсыг шинэ хөгжилд хүргэхээр зорьж байна гэж мэдэгдэв.
Тэрбээр Тайландын Хөрөнгө оруулалтын зөвлөлийн тоо баримтаас иш татан хэлэхдээ, Тайландын Хаант Улсын хөрөнгө оруулалтыг дэмжсэн төсөлд ажиллаж буй мэргэжилтнүүд болох 56,000 гаруй гадаадын иргэнд ажлын виз, ажиллах зөвшөөрөл олгосон гэв. Тухайлбал, АНУ-аас 791, ОХУ-аас 479, ИБУИНХАУ-аас 332, БНХАУ-аас 277, ХБНГУ-аас 236, Япон Улсаас 207, БНФУ-аас 198 зэрэг 4000 гаруй урт хугацааны оршин суух виз (LTR)-тэй иргэд байна.
Түүнчлэн зорилтот салбарын чадварлаг боловсон хүчин, хөрөнгө оруулагчид болох 2170 ухаалаг визтэй боловсон хүчин нь гол төлөв АНУ, ОХУ, ИБУИНХАУ, Япон Улс, ХБНГУ-ын стартап компаниуд байна. Засгийн газрын хэвлэлийн төлөөлөгч Чай хэлэхдээ, LTR ангилалын виз нь Тайландын Хаант Улсад ажиллаж буй мэргэжилтэн нь өндөр орлоготой иргэд болон эхнэр, нөхөр, хамтрагчдын хамт байгаа тэтгэвэрт гарсан хүмүүс гэсэн дөрвөн төрлийн өндөр чадамжтай гадаадын иргэдийг татах Засгийн газрын хүчин чармайлтад чухал үүрэг гүйцэтгэж байна.
Энэхүү виз нь Тайландын Хаант Улсад хязгааргүй олон удаа нэвтрэх, ажиллах зөвшөөрөл бүхий арван жил оршин суух эрхийг олгодог. Энэ нь мэргэшсэн боловсон хүчин хувь хүний орлогын албан татварын хэмжээг 17 хувь хүртэл бууруулах боломжийг олгож, Цагаачлалын албанд тайлагнах хугацааг 90 хоног тутам байсныг жилд нэг удаа болгосон. Түүнчлэн, тус улсын Засгийн газраас гадаадын олон авьяаслаг мэргэжилтнийг тус улсад ажиллаж, аялахад нь дэмжлэг үзүүлэх зорилгоор цахим ур чадвартай гадаадын иргэдэд зориулсан "Тайландын Хаант Улсад зорчих виз" (DTV) нэвтрүүлэх асуудлыг тус улсын Засгийн газар судалж байгаа бөгөөд DTV визний ангилалыг энэ сард нэвтрүүлэх төлөвтэй байгаа ажээ.
Эх сурвалж: Bangkok Post